A xornada deste domingo no Campionato de Europa de Maratón 2025, celebrado na localidade portuguesa de Ponte de Lima, tinguiuse de éxito para o piragüismo español cun dobre podio na proba de C2 sénior masculino.
As embarcacións galegas formadas por Jaime Duro (EP Cidade de Pontevedra) e Óscar Graña (Kayak Tudense) colgáronse a medalla de prata, mentres que Tono Campos e Diego Romero (Breogán) aseguraron o bronce, nunha regata de case dúas horas que mantivo a emoción até o final.
A competición comezou cun ritmo controlado pero exixente, onde as dúas duplas españolas, xunto á embarcación portuguesa, lideraban a proba.
Durante as dúas primeiras voltas, o tres barcos mantivéronse agrupados, pero o punto de inflexión chegou no porteo da terceira volta. Foi entón cando os lusos Rui Lacerda e Ricardo Coelho lanzaron un ataque decisivo que descolgou a Campos e Romeu, obrigándolles a remar en solitario o resto do percorrido.
Unha volta despois, os portugueses volveron impor un ritmo demoledor noutro porteo, logrando distanciarse tamén de Jaime Duro e Óscar Graña, quen até ese momento aguantaran con firmeza.
A partir dese momento, as posicións consolidáronse, e as diferenzas mantivéronse estables até o final da proba.
A vitoria foi para a parella local de Lacerda e Coelho, cun tempo de 1:40:37.32. Duro e Graña cruzaron a meta como subcampións de Europa en 1:42:02.01, e Campos e Romeu pecharon o podio en 1:43:55.53.
Este bronce súmase ao conseguido o día antes por Tono Campos en C1 sénior.
Pola súa banda, na final de K2 sénior masculino, Iván Alonso (Club Piragüismo As Torres-Romaría Vikinga), quen competiu xunto ao madrileño Adrián Martín (Piragüismo Aranxuez), finalizou nunha meritoria novena posición cun tempo de 2:03:34.30 despois de sufrir un contratempo co temón a falta de dúas voltas.
A vitoria nesta proba foi para os portugueses Fernando Pimenta e José Ramalho, quen se impuxeron ao sprint aos húngaros Adrian Boros e Tamas Erdelyi (segundos). O podio completárono os tamén españois Miguel Llorens e Alberto Plaza, que lograron unha valiosa medalla de bronce.
Con estes resultados, o equipo español pecha a súa participación no campionato europeo cunha sólida actuación nas categorías sénior, destacando unha vez máis o papel crucial do bloque galego.