O obxectivo marcado polo Poio Pescamar ao comezo de tempada, máis aló de lograr a permanencia, situouse en pelexar pola oitava praza na Primeira División, que este ano dá dereito a xogar a Copa de España. Por iso o choque deste sábado (18:30 horas) no pavillón da Seca cobra especial importancia.
O equipo vermello recibe na súa pista ao Majadahonda, que ocupa actualmente esa oitava praza con só dous puntos de vantaxe sobre as pontevedresas.
Será ademais o último partido do ano para o Poio, xa que tras esta xornada chega o habitual parón polos compromisos da Selección Española, que afrontará o Torneo 4 Nacións xunto aos combinados nacionais de Portugal, Italia e Rusia.
A liga na Primeira Feminina non se retomará ata o 7 de xaneiro, polo que as xogadoras adestradas por Marcio Santos queren ir de vacacións con boas sensacións.
O técnico brasileiro contará con todo o plantel para o choque, cunha convocatoria composta por: Silvia, Sara, Charo, Jenny, Carol, Jessy Lores, Patri Corral, Suki, Jessi, Ceci e Ale de Paz.