Empate que serve de pouco a uns e outros. Boiro e Arosa repartiron puntos en Barraña nun derbi da ría de Arousa que segue deixando aos locais nunha posición delicada, mentres os arlequinados tampouco reducen distancias con respecto aos postos de play-off.
Partido tenso e intenso no que os de Piscis o fixeron case todo, o bo e o menos bo. Primeiro foi Adrián Camiño, que adiantou aos seus no marcador ao transformar un penalti na primeira parte, para rematar expulsado por dobre amoestación na segunda. Despois porque o gol do empate do Boiro chegou nunha xogada desgraciada, na que o central arosista, Juan, rematou metendo o balón na súa propia porta.
Primeira parte con pouco xogo e moitas interrupcións, na que o Arosa chegou máis. Capelo puido marcar no minuto 22, pero intentou o remate case sen ángulo. Logo chegaría o gol, nun remate de Rivas que deu no brazo de Jose Antonio. Penalti que transformou Adrián Camiño pouco antes do descanso.
Na reanudación o Boiro fíxose co control do partido e despois de que se lle anulase un gol a Armental por fóra de xogo, logrou empatar tras unha falta lateral na que Juan dubidou e acabou marcando en propia porta.
A pesar de xogar en inferioridade tras a expulsión do seu capitán, o Arosa tivo a grande ocasión de levarse a vitoria nun remate de cabeza ao longueiro de Nando.
CD BOIRO (1): Lorenzo; Jose Antonio, Borja, Marcos, Suso Martínez; Carmelo Yuste, Sende; Pablo Pillado, Padín (Gabi, min. 81), Adrián Armental; e Adrián Quintairos (Kevin Lojo, min. 70).
AROSA SC (1): Jorge Pérez; Santi, Juan, Martín, Álex Freire; Rivas, Yago Pérez; Pablito (Nando, min. 64), Adrián Camiño, Capelo (Alfonso, min. 89); e Javi Pazos (Quique Cubas, min. 64).
Árbitro: Pau García Fuster (Cataluña), auxiliado nas bandas por Micael Erlich e Josep Vilaro Alarcón. Expulsou o xogador do Arosa, Adrián Camiño, por dobre amarela (minuto 73). Amoestou a Jose Antonio, Sende, Marcos e Yuste, polos locais e a Martín e Rivas polos visitantes.
Goles: (0-1) Minuto 43: Adrián Camiño, de penalti. (1-1) Minuto 53: Juan, en propia porta.
Incidencias: Campo Municipal de Barraña (Boiro). Uns 600 espectadores.