Aínda que a competición oficial non se retomará na liga Asobal ata o 6 de febreiro, cando o Teucro visite a cancha do Guadalajara, os afeccionados do equipo azul poderán quitarse o 'mono' esta fin de semana cun amigable de nivel.
En plena etapa de preparación, o Teucro recibe este sábado (20:30 horas) ao Cangas no Pavillón Municipal dos Deportes co obxectivo de lograr unha óptima posta a punto.
Tras varias semanas de adestramentos, cunha parte física importante, Quique Domínguez poderá corrixir aspectos tácticos nos seus xogadores ante un rival que está a realizar unha tempada histórica, situado na terceira praza.
Os dous únicos equipos galegos da máxima categoría volverán verse as caras antes de final de mes, o venres 29, no Gatañal, Cangas.
A entrada para o público no Municipal pontevedrés será de balde.