A cuarta edición da Carreira Popular da Festa do Viño chega a Barro no mes de xuño (día 22), afianzándose no calendario deportivo galego e crecendo ano tras ano en participación e relevancia.
Na presentación oficial, celebrada este martes, estiveron o alcalde Xosé Manuel Fernández Abraldes; a concelleira de Deportes, Andrea Pérez; o edil responsable da Festa do Viño, Iván Bello; e o presidente do Club de Atletismo +9, Abel Barros, acompañado por outros membros da entidade organizadora.
A proba manterá o seu carácter inclusivo con categorías para todas as idades, desde percorridos adaptados aos máis pequenos até a carreira absoluta de 10 quilómetros para adultos.
Ademais do compoñente competitivo, desde a organización afirman que un dos aspectos máis valorados polos participantes é o ambiente de convivencia que se xera ao finalizar a competición, coincidindo coa celebración da Festa do Viño.
O alcalde destacou a implicación do Club de Atletismo +9, "chave" para alcanzar o nivel organizativo actual.
Así mesmo, incidiu na aposta do Concello por esta proba como ferramenta para fomentar a actividade física e os hábitos de vida saudables, ademais de servir como escaparate do patrimonio e a contorna natural do municipio.
As inscricións para esta cuarta edición abrirán o próximo 11 de maio e deberán formalizarse a través da web de Galitiming, onde tamén está dispoñible o regulamento.
Desde a organización lembran que as prazas son limitadas e animan ás persoas interesadas a inscribirse con antelación.