Primeira peza confirmada no plantel do Arosa para comptir en Segunda RFEF tras o seu brillante ascenso de categoría.
Sacando ao adestrador Gonza, que seguirá á fronte da nave, a primeira renovación no equipo foi a dunha peza chave dese ascenso.
José Manuel Leobalde 'Chema', porteiro titular durante o curso recentemente finalizado, renovou por un ano máis cos da Lomba.
"A miña primeira opción era o Arosa, a miña segunda opción era o Arosa e a miña terceira opción tamén era o Arosa", afirmou o gardameta en declaracións difundidas polo equipo tras a súa renovación.
"Vai ser unha tempada dura, con moitas viaxes bastante lonxe. Pero para iso queriamos ascender. Temos moita ilusión e ímolo a afrontar con moitas ganas e moitísima fame que é o que hai no club", sinalou.
Chema afrontará desta forma a súa segunda campaña no Arosa.
O pasado ano, tras aterrar na Lomba procedente do Noia, foi titular en 35 partidos de liga.
Achegará, sinala a entidade de Vilagarcía, "seguridade, ambición e traballo" baixo paus.