Por terceiro día consecutivo a piscina olímpica de Pontemuíños vibrou este sábado co mellor waterpolo continental nunha xornada na que se decidía o título da Europa Cup Feminina.
A actividade na instalación pontevedresa iniciouse co choque polo terceiro e cuarto posto, no que a Selección Española enfrontábase a Holanda.
O combinado nacional fíxose finalmente coa medalla de bronce ao superar a claramente ao seu rival (9-3), aínda que lle custou entrar no partido. Así no primeiro cuarto era o conxunto holandés o que dominaba (1-2), e non foi ata o segundo parcial cando da man dunha inspirada Clara Espar as españolas comezaron a marcar a pauta (4-2).
Tras o descanso as xogadoras adestradas por Miki Oca encarrilaron o encontro (6-3) para sentenciar nun inmaculado último cuarto.
Despois chegaría a pelexa polo título, por ser a primeira selección en levantar a Europa Cup, e esa honra foi par Grecia ao vencer a Rusia por un apertado 9-8.
O equipo ruso comezou tomando a dianteira no primeiro período (0-1), pero o cadro heleno mellorou para chegar ao tempo de descanso co marcador igualado (2-2).
O terceiro cuarto da final resultou decisivo polo gran acerto ofensivo de Grecia (6-3), aínda que Rusia non se deu por vencida e pelexou ata o último instante.
Co fin da Europa Cup toma a testemuña a natación na piscina olímpica co Campionato de España Infantil, pero só momentaneamente á espera do duelo da Liga Mundial de waterpolo que enfrontará o vindeiro martes 27 de marzo (21:30 horas) en Pontevedra ás seleccións de España e Hungría.