Avance importante na carreira de Gustavo Dacal co obxectivo de progresar na súa nova condición de atleta paralímpico.
O deportista de Ponte Caldelas, múltiple campión nacional de xavelina durante os seus anos como atleta profesional, terá este próximo mes de abril a súa primeira oportunidade de sumar puntos na clasificación internacional cos que achegarse aos grandes eventos europeos e mundiais.
Farao no Marrakech 2024 WPA Grand Prix - 8th International Para Athletics Meeting, que será a súa primeira competición internacional tras estrearse no atletismo adaptado en varias citas organizadas polo seu club, o Atletismo Rías Baixas-
Dacal competirá en Marrocos nun Meeting que se celebrará entre os días 21 e 28 de abril.