Até Filipinas desprazáronse estes días deportistas do Club Piragüismo Verducido-Pontillón e Náutico O Muíño de Ribadumia para participar no Mundial de 'Dragon Boat'.
Toda unha experiencia para as 'dragoas' pontevedresas que compuñan a Selección Española Feminina tras gañar ese dereito no Campionato de España celebrado en Trasona.
Ademais deportistas de Sevilla, o Rías Baixas de Boiro e a Ría de Aldán completaban o equipo nacional coas categorías masculinas.
España pechou a súa participación no Mundial con dúas medallas, unha de ouro conseguida na categoría DB10 Open senior masculina e unha de prata coa tripulación DB20 2.000 metros mixta.
Ademais a embarcación feminina do Verducido-Pontillón demostrou o seu gran nivel cun meritorio cuarto lugar na categoría DB10 2.000 metros.
Filipinas encabezou o medalleiro mundialista cun total de 11 medallas de ouro, mentres que Tailandia ocupou o segundo lugar con oito títulos.
A Selección Española ten previsto regresar este martes 5 de novembro, cun voo que aterrará en Porto.
Na casa esperan amigos e familiares para homenaxear como se merecen a este grupo de deportistas que demostrou ser todo un exemplo de compañeirismo e superación.