Íker Pérez e Alba Maestro gañan a proba reina da Volta a nado Illa de Tambo

Co mar en calma e unhas condicións meteorolóxicas ideais, a V Volta a nado Illa de Tambo-Concello de Poio reuniu este domingo a 230 nadadores chegados de doce comunidades autónomas e de países como Portugal, Brasil, Suíza, México ou Noruega.

Desde primeira hora da mañá, o porto de Combarro encheuse de gorros de cores, neoprenos, embarcacións de apoio e decenas de familiares e curiosos que seguiron desde terra unha das probas de augas abertas que máis creceu en Galicia.

O gran protagonista da xornada foi o nadador poiense Íker Pérez García, do Club Natación Galaico, que fixo valer a súa condición de coñecedor destas augas para imporse na proba reina de seis quilómetros, completando a exixente volta íntegra á illa de Tambo nun tempo de 1:28:21.

Cruzou a meta con máis de tres minutos de vantaxe sobre Álvaro Gómez Cardesín, do Club Natación Coruña (1:32:16), mentres que o terceiro posto foi para Juan Miguel Fins Seoane, do CNS A Estrada (1:36:35).

Na clasificación feminina desta distancia, a vitoria foi para a catalá Alba Maestro Lorenzo, do Club Natació Atlètic Barceloneta, cun rexistro de 1:30:48, por diante de Daniela González Ramiro, do Santa Olaya (1:33:21), e de Nerea González Ramiro, tamén do conxunto asturiano (1:47:31).

A modalidade de seis quilómetros sen neopreno tamén deixou un alto nivel competitivo. O triunfo correspondeu ao catalán Jordi Corominas Jódar, do Máster Torrijos de Toledo, seguido de Eduardo Porset Llantada e Jesús Carlos Quintas Barros. En categoría feminina, a viguesa Vanesa Rodríguez Pérez, do Club Natación Rías Baixas, foi a primeira en alcanzar a meta, por diante de Esperanza Navarro Simón e Agurtzane Domingo Inhiesto.

A proba de 4,5 quilómetros, que levaba aos participantes até a praia de Area da Illa, no norte de Tambo, antes de regresar a Combarro tras superar un control de paso obrigatorio, tivo como vencedor absoluto a Pedro Pablo Bernández Ferreirós, cun tempo de 1:09:04. Completaron o podio Jaime Martínez González e David Daporta Méndez. En mulleres, a vitoria foi para África Ochoa de Teresa, seguida por Rebeca Muñoz Gutiérrez e Jessica Martínez Esteban.

Nesta mesma distancia, pero sen neopreno, os primeiros postos foron para Álvaro Cendón Jáuregui, Rafael Tabarés Domínguez e Jesús Blach Castro, mentres que en categoría feminina impuxéronse Beatrice Vitull Quinzán e Cristina Dopazo Taboada.

A xornada tamén reservou espazo para os nadadores máis novos coa proba dun quilómetro. Na categoría sub-16 venceron Miguel Rey Fernández e Elena Gómez Gómez, mentres que na categoría absoluta os triunfos foron para Marco González Blanco e Inés Borge Juste.

Máis aló da competición, a organización quixo recoñecer o esforzo e a participación con varios premios especiais. A balear Clara de Ysasi Sancho, de tan só dez anos, recibiu o galardón á nadadora máis nova; o noruegués Geir Ingolsfsrud, de 83 anos, foi distinguido como o participante de maior idade, mentres que Íker Pérez recibiu ademais o recoñecemento como primeiro nadador censado en Poio.

Para garantir o desenvolvemento da proba despregouse un amplo dispositivo de seguridade formado por 16 embarcacións e 17 kayakistas e practicantes de paddle surf, coa colaboración de Protección Civil de Poio, Garda Civil do Mar, a Escola Naval Militar, clubs náuticos e de piragüismo da comarca, ademais de diferentes entidades vinculadas ao mar. As boias instaladas nos tres percorridos facilitaron a orientación dos deportistas durante toda a travesía.

Á súa chegada a meta, os participantes puideron recuperar forzas cun servizo de avituallamiento grazas á colaboración de Supermercados Froiz, gozar de masaxes ofrecidas pola Academia Galega de Masaxistas e recibiron como recordo un pequeno hórreo conmemorativo da proba, ademais de compartir un aperitivo cortesía de Avigal que puxo o broche á xornada.