Non hai xornada sen noticias do Arosa, que camiña con paso firme e seguro na planificación da próxima tempada.
O club arlequinado confirmou este mércores dúas novas renovacións, de homes ademais con importante presenza no equipo a última tempada.
En especial foi así no caso de Iñaki Martínez, convertido nun fixo no once estas dúas últimas campañas e sendo segundo máximo realizador arosista na liga recentemente finalazada, na que sumou seis tantos.
Ademais tamén continuará na Lomba, na que será a súa segunda campaña no equipo, o extremo Javi Pereira, xogador que aterrou o pasado verán en Vilagarcía procedente do Alondras.
Con Iñaki e Javi Pereira son xa oito os futbolistas confirmados no Arosa, ao sumarse á lista na que xa figuraban Pacheco, Noel Chaves, Antón Concheiro, Dani Sánchez, David Conde e Sergio Prieto.
Pola contra o que non seguirá no bloque arlequinado será Santi Gegunde.