Novo éxito para Irene Trabazo. A deportista do Club Ciclista Marín proclamouse en Xátiva campioa da Copa de España de ciclismo en estrada en idade cadete.
Trabazo completa así unha gran tempada, na que tamén se proclamou campioa de España e da Copa Federación de ciclocrós, a súa especialidade.
A ciclista marinense finalizou segunda na última proba da Copa de España, a 2 minutos e 24 segundos da valenciana Sofía Rodríguez (Romovi-Rustic), mantendo o maillot de líder ante a ausencia da súa principal rival, Cristina Soler, que se encontraba disputando o Nacional de pista.
Irene Trabazo rematou con 309 puntos, polos 209 de Cristina Soler e os 196 de Sofía Rodríguez.
A flamante campioa recoñeceu en declaracións recollidas pola Federación Española de Ciclismo que "a carreira foi moi dura, pero saín tranquila porque xa tiña os deberes feitos e sabía que ía ter menos rivais que noutras ocasións. Loxicamente estou moi contenta e agora toca descansar e pensar xa na tempada de ciclocrós".