A subdelegada do Goberno en Pontevedra, Maica Larriba, recibiu este luns a Irene Vilaboa, adestradora do SD Teucro e primeira muller á fronte dun equipo da División de Honra Prata do balonmán español.
Acompañada na Subdelegación do Goberno polo delegado do equipo, Javier Domínguez, Larriba expresou que "é un inmenso pracer poder recibir hoxe a unha figura do deporte da talla de Irene Vilaboa. Unha referente no ámbito deportivo e tamén na loita pola igualdade".
A mandataria socialista quixo tamén destacar o compromiso do Goberno co deporte feminino en España "mellorando as condicións das deportistas e fortalecendo as súas estruturas deportivas, así como facendo efectivo o principio de igualdade entre mulleres e homes mediante a promoción da presenza da muller en todas as esferas e categorías deportivas". A firma do primeiro convenio colectivo do fútbol feminino que tivo lugar no mes de febreiro no Congreso foi posto como exemplo deste compromiso por parte de Larriba.
Antes de tomar as rendas do Teucro, Vilaboa xa fora a primeira adestradora en dirixir a un equipo en Primeira Nacional, fíxoo en Bueu, despois de pasar polo BM Porriño e ao Atlético Guardés. Tamén formou parte do corpo técnico da selección española júnior feminina durante dez tempadas nas que, entre outros éxitos, conseguiu unha medalla de prata no Europeo do 2007.