Non puido ser. Jean Marie Okutu non conseguiu clasificarse para a final de salto de lonxitude no Campionato de Europa Absoluto de Atletismo que comezou este luns en Berlín.
O atleta marinense non conseguiu achegarse aos 8 metros que daban o pase directo á loita polas medallas o vindeiro mércores, e tampouco puido meterse entre os 12 mellores saltadores da rolda clasificatoria.
O certo é que non foi un concurso con boas marcas entre todos os competidores, e aínda que Okutu debutou cun aceptable 7,66 metros que lle poñía sexto do seu grupo na primeira rolda de saltos, non puido logo mellorar.
O deportista do Fútbol Club Barcelona realizou outros dous saltos válidos, de 7,52 e 7,59 metros, sendo noveno nun Grupo A que dominou o británico Dan Bramble (7,89 metros), e vendo como no Grupo B o resto de competidores deixábanlle lonxe da gran final.