Os turistas de orixe estranxeira que visitan as Rías Baixas superaron por primeira vez na historia aos visitantes nacionais, tras alcanzar o 51% do total durante o pasado mes de maio.
O incremento dos visitantes internacionais, segundo os datos que desvelou este martes Turismo Rías Baixas, foi dun 12% con respecto ao ano anterior.
En liñas xerais, o número de visitantes que pasaron en maio polas Rías Baixas creceu un 6% con respecto ao mesmo mes de 2025 e a provincia de Pontevedra rexistrou case o 35% dos visitantes que acudiron a Galicia.
Sanxenxo, cun 12% máis con respecto ao ano anterior, e Pontevedra, cun incremento do 9%, foron as localidades onde máis aumentou a chegada de turistas.
No que respecta ao mes de xuño, a oficina de turismo de Rías Baixas, situada no Palacete das Mendoza, en Pontevedra, rexistrou xa a visita de máis de 2.300 persoas.
Entre os visitantes internacionais destacan os alemáns, franceses, portugueses e estadounidenses e entre os españois os procedentes de Madrid e Barcelona.
A principal motivación para visitar a provincia é o Camiño de Santiago e a oferta de lecer.
Con respecto ao Camiño de Santiago, percorreron algún dos itinerarios que atravesan a provincia de Pontevedra un total de 24.352 peregrinos este mes de xuño, o que supón un 20% máis que o pasado ano.
Deles, 11.696 fan o Camiño Portugués, 11.483 o Camiño Portugués pola costa, 762 percorren a Vía da Prata e 276 o Camiño de Inverno.
O 80% son estranxeiros e proceden de Estados Unidos, Portugal, Italia e Alemaña.
Estes datos, segundo o presidente da Deputación de Pontevedra, Luís López, demostran que "imos polo bo camiño" e que a estratexia impulsada para internacionalizar o destino permitiu "colleitar xa os froitos dun traballo ben feito".