Sobresaliente debut de Jéssica Bouzas en Wimbledon, onde se impuxo con autoridade á austriaca Anastasia Potapova por 6-2 e 6-3.
A tenista de Vilagarcía dominou o encontro de principio a fin, mostrándose moi ordenada no seu xogo e desbordando de forma constante á número 28 do mundo.
Bouzas marcou o ritmo do partido con solidez desde o fondo da pista e apenas concedeu opcións á súa rival, á que superou con claridade en ambos os sets.
O único momento de dúbida chegou cando, con 5-2 no segundo set, sacaba para pechar o partido.
Nese xogo concedeu até cinco bólas de break, unha das cales aproveitou Potapova para recortar distancias e situar o 5-3 no marcador.
Lonxe de acusar o golpe, Bouzas reaccionou de inmediato ao resto e asinou un xogo en branco para romper de novo o saque da austriaca e selar o seu pase á segunda rolda do Grand Slam londiniense, onde se medirá á ucraína Dayana Yastremska, que venceu en tres sets a xaponesa Aoi Ito (7-6, 4-6 e 7-5).