O Club Cisne Balonmán continúa traballando para reforzar o persoal e encarar o próximo ano en Honra Prata. Esta fin de semana pechou outra das súas renovacións: a do gardameta Jorge Villamarín, recentemente incorporado ao equipo (en marzo deste ano), procedente do Sinfín cántabro, militante na máxima categoría española.
O coruñés chegou a Pontevedra cando o cadro cisneísta acumulaba tres derrotas consecutivas. Xogábase, por unha diferenza de tres puntos, a entrada nos play-off a Asobal e o club apostou por afianzar a portería con Villamarín. Aínda non conseguindo pelexar polo ascenso, a partir de aí, os de Jabato gañaron catro dos sete partidos que faltaban para o termo do curso.
Jorge confesa estar "feliz e agradecido ao Cisne por confiar en min para a próxima tempada. Esperemos estar á altura, que sexa un ano bonito e que gocemos ao máximo da División de Honra Prata, que será, un ano máis, igualada e esixente".
O gardameta súmase, así, á lista de xogadores que conformarán o equipo: Andrés Sánchez, Pablo Picallo, Álvaro Preciado, José Leiras, Bruno Vázquez, Alejandro Conde, Álex Chan, Javi Vázquez, David Chapela, Dani Ramos, Iván Calvo e Pablo Gayoso.