Juan Antonio Saavedra 'morde' medalla en Tokyo: Bronce na proba de carabina tendida

Pontevedra
05 de setembro 2021

A última medalla para España, a número 36 en total, nos Xogos Paralímpicos de Tokyo 2020 leva nome pontevedrés. O do tirador Juan Antonio Saavedra, que se colgou o bronce na súa proba favorita, a de carabina tendida 50 metros SH1

Juan Antonio Saavedra coa medalla de bronce en Tokyo 2020
Juan Antonio Saavedra coa medalla de bronce en Tokyo 2020 / Federación Española de Deportes de Personas con Discapacidad Física

A última medalla para España, a número 36 en total, nos Xogos Paralímpicos de Tokyo 2020 leva nome pontevedrés. O do tirador Juan Antonio Saavedra, que se colgou o bronce na súa proba favorita, a de carabina tendida 50 metros SH1.

Saavedra xa rozara o bronce na proba de 10 metros, pero foi na distancia de 50 metros, na que foi medalla de prata en Londres 2012, na que se subiu ao podio.

O tirador pontevedrés de 47 anos mostrou un gran nivel nesta proba. Accedeu á final coa terceira mellor puntuación e, aínda que chegou a liderar durante algún tempo, terminou na terceira praza ao sumar 226,3 puntos.

O ouro nesta competición mixta foi para a eslovaca Veronika Vadovicova, que logrou 248,9 puntos; e a prata para a sueca Anna Normann, que quedou en 248,5 puntos.

Con esta medalla, España pecha a súa participación nos Xogos Paralímpicos con 36 medallas, das 9 foron de ouro, 15 foron de prata e 12 foron de bronce.

Xunto coa presea de bronce, Juan Antonio Saavedra regresará a Pontevedra cun diploma olímpico polo seu cuarto posto na proba de carabina tendida 10 metros R3.