O Centro Galego de Tecnificación Deportiva (CGTD) acolle o obradoiro "Fisioloxía deportiva e novas metodoloxías no adestramento de alto nivel", unha cita que busca reforzar o carácter científico e innovador do deporte galego.
As xornadas, que comezaron este venres e continúan hoxe sábado, están dirixidas especialmente a adestradores de alto nivel e contan coa participación do recoñecido doutor Juan Carlos Mazza.
Este especialista en fisioloxía do deporte e ciencias do exercicio ten unha ampla experiencia en seleccións nacionais e é membro do American College of Sports Medicine (FACSM).
O secretario xeral para o Deporte, José Ramón Lete Lasa, participou na apertura do obradoiro e destacou a presenza de Mazza como "unha oportunidade excepcional para seguir construíndo un deporte galego máis científico, máis preparado e máis competitivo".
O responsable autonómico subliñou tamén que Galicia está vivindo un momento de crecemento sen precedentes, con máis de 1.700 deportistas galegos de alto nivel, o que supón un incremento do 400% dende 2009.
O secretario xeral puxo en valor o papel do CGTD de Pontevedra e dos seus "satélites": o complexo de regatas de Verducido e o Centro Galego de Vela de Vilagarcía, así como os 14 núcleos de adestramento deportivo Especializado que conforman a rede galega de tecnificación.
Lete lembrou, ademais, que está en marcha o proxecto para converter o CGTD nun auténtico centro de alto rendemento, unha iniciativa que permitirá acoller o crecemento do deporte galego e atraer novos talentos doutros puntos de España e do mundo, consolidando así a Galicia como referente internacional do deporte e da excelencia deportiva.
