Non pasaron nin dous anos desde que Lourdes Domínguez anunciase a súa retirada do tenis profesional, despois dunha longa carreira que lle levou a ser considerada a mellor tenista galega da historia. Por aquel entón xa deixaba intuír por onde podía discorrer o seu futuro, sempre ligado ao deporte da raqueta.
Agora, despois dun período de descanso, ese futuro pasa por volver ao circuíto profesional como adestradora.
En Barcelona Lourdes comezou a traballar coa súa compañeira e amiga Ana Alcázar cun grupo de xogadoras entre as que destaca Aliona Bolsova, tenista española de 20 anos que desexa chegar lonxe na WTA.
O certo é que os resultados non se fixeron esperar, e Aliona en pouco máis dun mes pasou de estar próxima ao posto 350 do ranking mundial a situarse no posto 185. O motivo deste ascenso foron os seus dous triunfos consecutivos nos torneos ITF 25.000 en Darmstadt (Alemaña) e Getxo, no País Vasco.
No horizonte asoma xa a fase previa o US Open, último Grand Slam do ano para o que a xogadora de orixe Moldavo xa ten billete, coa confianza que lle deu o traballo coas súas novas adestradoras.
Trátase só do inicio dunha etapa, pero que de seguro reportará grandes éxitos a Lourdes Domínguez, que como xogadora chegou a gañar dous torneos WTA e outros 17 de categoría ITF e a situarse entre as 40 mellores raquetas do Mundo.