AS SOMOZAS: Servizo especial para Pontevedraviva de www.ferrol360.es. Texto de Raúl Salgado e Fotos de 13fotos.
Doce presaxio dun derbi potente, amenceu con sol As Somozas. Empeñados en ofrecer as súas mellores versións, Somozas e Pontevedra arrincaron o seu duelo do Alcalde Manuel Candocia con toda a carne no asador. O guion reservaba unha progresiva relaxación e a recuperación posterior do vigor en ambos os bandos. Montaña rusa de emocións.
Se no primeiro período o brillo deixouno o conxunto local, os de Luisito tiraron de estratexia para desarbolar con rapidez o sistema do conxunto de Stili. Unha cita de reivindicación verdibranca desde solventes individualidades, un partido cosido desde o prestixio que atesoura a sala de máquinas anfitrioa.
Os goles non chegaron ata a continuación, cando o xogo parecía afrouxar. Borjas non esperou máis que cinco minutos e asestou o golpe, pero o asedio do Somozas atoparía premio co tanto de boa factura do capitán Pablo Antas un cuarto de hora despois. Volvían as táboas e o ritmo.
Un Pontevedra encargado de apertar non puxo as cousas tan complicadas como cabería esperar tras adiantarse. A pesar dun segundo susto ante Javier Mandaluniz, o Somozas pecaba de entretemento e illábase con accións maxistrais, pero pouco efectivas. Espertou a fera e a pugna igualouse.
Mario Barco, completísimo ao arranque, enfundou o traxe. Manobra colectiva: gustábanse e iso non reducía nadiña de nada as súas opcións. A entrada de David Añón inxectou alegría e dotes de maxia, abocando ao técnico pontevedrés a precipitar o seu último cambio a falta de case vinte minutos para a sentenza.
Coma se fose unha película, o escenario retrocedía ao primeiro asubío. Dunha defensa perfectamente armada deuse o salto a un asedio oportuno. Serge Leuko desenganchaba e o resto da zaga presumía de contundencia e criterio. Dúas oportunidades no primeiro minuto, a cargo de Mario Barco e Joseba Beitia, xa deran algunha pista.
Aplausos para os onces e sonora pitada para o colexiado. Tarde festiva no recinto e o definitivo descubrimento de Keko, chegado no mercado invernal por cesión do Lugo. Demostrou arroxo a pesar da súa mocidade e entrega a proba de bomba. Meditaba Antonio López, resolvía Juan Rodríguez e asumía mando Marcos Remeseiro.
Volveu, ademais, ao sobresaliente Antón de Vicente con varios balóns que se resistiron a acariñar a rede. Borjas sabía quedar a soas, aínda que a indefinición non alumaba perigo a maiores. A ofensiva do Lérez estivo comandada por un excelente Bello, capaz de cambiar de rol segundo avanzaba a función.
A bancada exhibía peticións diáfanas e reclamaba cambios á caseta. Houbo recompensa para o que esixían, ambiente de gala. Con Bello non atopaba conexión adecuada a retagarda e certos puntais non escondían o seu enfado. Cabezazos, disparos e despexes completaron o taboleiro.
Progresivamente, a seriedade restou fogos artificiais. Á tardiña, retornouse aos cuarteis e Quique Cubas non fallou na súa vocación de refresco. Aparentemente decantada, a sesión asistiu a un Pontevedra envorcado sobre área rival e sen máis afán que repetir a súa liña de tempo errónea.
As intencións copeiras das dúas escuadras quedaron conxeladas co empate, todo quedou como estaba. O Somozas repite como local a próxima semana con outro derbi, esta vez ante o Celta B. Será o vindeiro domingo, con inicio ás seis da tarde. Achégase a meta.
UD SOMOZAS (1): Javier Mandaluniz; Serge Leuko, Marcos Remeseiro, Juan Rodríguez, Antonio López, Mateo Garcías, Keko (David Añón, minuto 59), Antón de Vicente, Mario Barco (Quique Cubas, minuto 85), Joseba Beitia e Pablo Antas (Dani Pedrosa, minuto 80).
PONTEVEDRA CF (1): Company; Miguel, Verdú, Pablo, Capi, Kevin Presa, Bello (Mouriño, minuto 67), Álex Fernández, Borjas, Jacobo (Pedro, minuto 73) e Hugo (Anxo, minuto 62).
Árbitro: López Fernández (Madrid). Amoestou aos visitantes Bello e Pablo.
Goles: (0-1) Minuto 50: Borjas. (1-1) Minuto 66: Pablo Antas.
Incidencias: Campo Alcalde Manuel Candocia (As Somozas). 500 espectadores.