Os Internacionais de Chelva, na Comunidade Valenciana, inauguran este domingo 6 de marzo o Open de España de Cros Country Olímpico (XCO), competición na que defende título Lucía Vázquez.
A ciclista de Vilaboa ten como obxectivo esta tempada progresar no ránking internacional e encamiñou a súa preparación ás citas da Copa do Mundo, pero non renuncia a realizar un bo papel no Open. Ademais "esta carreira é a única C1 do Open de España, as outras catro son C2", explica a biker en relación á categoría e puntos a repartir na proba.
En Chelva espera "estar na loita pola vitoria ou por subir ao podio porque o triunfo vaise poñer moi caro se finalmente participa a número seis do mundo Irina Kalentyeva", sinala.
Salvando á rusa, as principais rivais da vixente campioa galega serán as españolas Rocío Martín (Primaflor-Orbea) e Sandra Santanyes (MMR Powerada).
Lucía chega con boas sensacións tras asinar unha 29ª posición na Cyprus Sunshine Cup a pasada semana nunha carreira por etapas que contaba cun grande nivel competitivo. "Volvín contenta e sorprendeume facelo tan ben. Gustaríame quedar un pouco máis arriba na clasificación, pero coa lista de inscritas que había é para estar satisfeita", explicou a cislista pontevedresa tras esta competición.