Máis de 200 nadadores para a IV Volta a nado Illa de Tambo

A Praza da Chousa de Combarro foi escenario este xoves da presentación da IV Volta a nado Illa de Tambo-Concello de Poio.

A travesía de natación en augas abertas celebrarase nesta ocasión o domingo 17 de agosto.

Farao coa previsión de contar con máis de 200 participantes entre as súas diferentes categorías, entre os que se atopan nadadores de Francia, Portugal e de até dez comunidades autonómas españolas.

Deportistas de idades moi diversas confirmaron a súa presenza, como a asturiana Adriana Fraga do Club Natación Las Anclas (12 anos) ou o pontevedrés Manuel Cruces do Club Natación Galaico (81 anos).

A saída e chegada da proba, con percorridos de 1 quilómetro, 4,5 quilómetros e 6 quilómetros de distancia, estará situada na Praza da Chousa, onde haberá zonas de avituallamiento, servizo de masaxes e entrega de premios. Ademais, este ano todos os nadadores estarán convidados a unha paella ao finalizar a competición segundo sinala a organización do evento, a cargo de Atlantic Extreme Sports xunto ao Concello de Poio.

Para garantir a seguridade despregarase un amplo dispositivo na ría de Pontevedra con 16 embarcacións, 20 kaiaks e 10 paddle surf. A proba contará ademais co apoio de Protección Civil de Poio e Marín, Escola Naval Militar de Marín, Marina Combarro, Club Marítimo de Raxó, Nauta Sanxenxo, Garda Civil do Mar, PescaCíes, Club de Piragüismo de Poio, Paddle Surf Sanxenxo e a asociación de voluntarios Vodea.

A travesía a nado de 6 quilómetros levará aos participantes a dar a volta completa á illa de Tambo, mentres que no percorrido de 4,5 quilómetros os nadadores chegarán até a praia de Area da Illa, situada ao norte de Tambo. No que respecta á proba curta, de 1.000 metros, celebrarase nas inmediacións da Praza da Chousa.

Paralelamente á parte estritamente deportiva, os nadadores e os seus acompañantes poderán gozar dunha visita guiada á Illa de Tambo o sábado 16 de agosto para descubrir a historia e o patrimonio natural e cultural da illa.