O Marín Club de Fútbol é novo equipo de Preferente Futgal. Os de Sergio Martín impuxéronse ao CD Córgomo este sábado en San Pedro nun disputado partido de volta da final do play-off despois de asinar un empate sen goles na ida (0-0).
Facelo non foi nada sinxelo, pois ninguén logrou romper a igualdade unha vez finalizados os 90 minutos (1-1) e tras unha prórroga sen cambios de guión, todo decidiuse nuns penaltis que Cristian Rosales encargouse de resolver en favor dos marinenses (6-5).
Os máis de mil espectadores congregados nas bancadas do campo de San Pedro gozaron dun emocionante encontro que se foi ao descanso con 0-0 no marcador e que Sylla desnivelou a pouco máis de vinte minutos para o final (1-0). Foi nun centro raso do ex granate Espi que o atacante senegalés aproveitou para adiantar aos seus.
Botouse atrás o conxunto local para minimizar as opcións do Córgomo de igualar o encontro. O plan funcionou e todo parecía indicar que o tempo regulamentario sería suficiente para coroar o Marín como vencedor, pero un gol de Poli Romero no minuto 97 devolveu a igualdade e levou a eliminatoria ao tempo extra (1-1).
Non pasaron demasiadas cousas nos dous tempos de quince minutos da prórroga polo que todo decidiuse nunha agónica quenda de penaltis que se alargou até os catorce lanzamentos.
Avantaxouse o conxunto marinense ao comezo da quenda, pois Cristian detivo o segundo lanzamento dos ourensáns cunha boa estirada. Con todo, Sylla errou o terceiro golpeo do Marín e Pablo Romero aproveitou para de volver a igualdade unha vez superado o terceiro lanzamento de cada equipo (2-2).
Foi entón cando ambos os conxuntos entraron nun intercambio de golpes onde os lanzadores mostraron a súa mellor versión. Completáronse o dez penaltis regulamentarios e todo quedou en mans da morte súbita.
O momento clave da noite produciuse tras o gol de David Veiga para pór o 6-5 no electrónico, pois Abiodun Durojaiye golpeou o decimo cuarto penalti da quenda e Cristian Rosales alzouse como heroe tras adiviñar as súas intencións e deter o lanzamento para darlle o ascenso ao Marín Club de Fútbol.
Obxectivo cumprido para o equipo de Sergio Martín, que non logrou o ascenso pola vía rápida pero si cumpriu no play-off para devolver o equipo marinense a Preferente doce tempadas despois.