Unha medalla de ouro cun sabor moi especial.
Melania Rodríguez iniciou a tempada de Copas do Mundo de Ximnasia cun triunfo en Italia, na localidade de Riccione, na súa especialidade de dobre minitramp (DMT), na que chegou a ser campioa mundial.
Era ademais a primeira competición internacional sen a presenza de Pablo Hinojar como seleccionador, e por iso a ximnasta pontevedresa non se esqueceu do que foi o seu adestrador na celebración de tan positivo resultado.
"Esta medalla é túa Pablo. Primeira copa do mundo do ano e primeira sen ti, non foi unha competición nada fácil pero volvémolo a conseguir", afirmou a deportista do Club Ximnasia Pontevedra nas súas redes sociais tras conseguir a medalla de ouro.
Melania avanzou en Riccione á final de DMT cunha puntuación de 51.300.
Xa na final conseguiu no seu exercicio unha puntuación de 26.900 coa que superou á portuguesa Diana Gago e tamén a Galina Begim, deportista con bandeira neutral, que foron prata e bronce respectivamente.
Todo un logro que reforza o traballo de Melania e dálle forzas para o resto da tempada.
Tras esta cita, a seguinte proba da Copa do Mundo de Ximnasia Trampolín terá lugar o 5 e 6 de xullo na localidade portuguesa de Coimbra.