O debut de Minata Keita como xogadora do Club Baloncesto Arxil non puido resultar máis positivo. Ademais do triunfo do equipo ante o Universidad de Valladolid (69-50) a pívot maliana foi nomeada como xogadora máis valiosa (MVP) da xornada na Liga Feminina 2.
Keita asinou no seu primeiro partido no conxunto lerezano dobres figuras con 29 puntos e 15 rebotes para alcanzar os 35 de valoración, contribuíndo a unha vitoria que sitúa o Arxil na quinta posición da clasificación.
A pívot, que procede do próximo rival das verdes, o Al-Qázeres Extremadura, alcanza na presente liga en dez partidos disputados unha media de 16 puntos, 11 rebotes e 18 de valoración.
Ademais de Minata Keita no cinco ideal da xornada aparace a base do Portomar Cortegada de Vilagarcía, Monserrat Gilabert, que asinou 26 de valoración grazas aos seus 9 puntos, 5 rebotes e 16 asistencias ante o Pabellón Ourense.
Completan o quinteto a aleiro Naiara Díez (Gernika Bizkaia), a escolta Verónica Sánchez (Al-Qázeres) e a ala-pívot Callan Taylor (Al-Qázeres).