Despois de oito meses de competición en diferentes localidades de todo o planeta, a Copa do Mundo de Tríatlon chegou á súa fin o pasado sábado cunha última proba en Tongyeong (Corea do Sur).
Era a última oportunidade este ano para que os atletas puidesen sumar puntos para a clasificación olímpica e nela participaba un pontevedrés, Pablo Dapena. Pero unhas molestias na perna, que arrastraba desde facía uns días, impedíronlle render a un bo nivel e tivo que abandonar antes de terminar a carreira a pé.
Mellor sorte correu o seu compañeiro, David Castro, que alcanzou a segunda posición e colgouse a medalla de prata tras o británico Matthew Sharp.
Pablo Dapena comezou moi ben a proba en terras coreanas. Saíu de auga, tras 1,5 quilómetros nadando, nas primeiras posicións a escasos segundos do líder, o estadounidense Ben Kanute. Xunto a Castro, establecéronse nun folgado pelotón cabeceiro ao principio dos 40 quilómetros sobre a bicicleta.
Ao remate da primeira volta do circuíto ciclista, a totalidade dos contendentes circulaba nun único grupo, con ambos os españois controlando as cinco voltas do percorrido desde metade do bloque. Chegados á última volta do tramo os dous españois manobraron para situarse para unha entrada masiva na segunda transición. Pero foi na carreira a pé onde a dor se fixo insoportable para Dapena.
O pontevedrés explicaba a través da súa conta de Twitter que "saín a correr desde o principio con dor, aínda que soportable", pero só puido aguantar ata o terceiro dos dez quilómetros deste último segmento. A perna díxolle basta e viuse obrigado a abandonar.
A pesar deste revés, Pablo Dapena seguirá en Asia uns días, xa que o próximo 1 de novembro participará na Copa Asiática de tríatlon que se disputará en Hong Kong.