Primeiros quilómetros da tempada para o Grupo Deportivo Supermercados Froiz.
Tras estrear curso no recente Memorial Manuel Sanroma disputado en Almagro, o equipo ciclista pontevedrés protagoniza estes días na casa a súa tradicional concentración de principio de ano.
Será a tempada número 37 de Froiz no pelotón nacional, un ano no que se pon o reto de volver ser competitivos deixando atrás un curso irregular.
"Temos un equipo máis completo que o ano pasado, máis equilibrado", asegura o director deportivo do equipo alimenticio, Evaristo Portela.
Por iso un dos obxectivos será o de tentar brillar na Copa de España Elite e Sub-23, case unha obsesión xa para o Froiz.
Non será un reto sinxelo porque "a competencia é dura e os filiais teñen todo ao seu favor confiorme está o ciclismo, pero non imos a buscar escusas. Pelexaremos de tú a tú", asegura Portela.
Unha das principais bazas do Froiz volverá ser Mateu Estelrich, que vén de ser terceiro en etapa inicial do Memorial Sanroma.
"Xa ganou o ano pasado unha proba de Copa de España no País Vasco. Imos loitar con el pola xeral elite. Temos que intentalo porque Froiz é un equipo gañador", defende o director deportivo pontevedrés ilusionado coa nova tempada.
A primeira proba puntuable da competición chegará xa este domningo 23 de febreiro co 59º Circuíto do Guadiana, en Don Benito.
Outro dos nomes a seguir este ano no Froiz será o pontevedrés Guillermo García Janeiro, tras varios anos competindo no pelotón profesional portugués. Os dous estarán na formación do Circuíto do Guadiana xunto a Ángel Maneiro, Adrián Pacho, Lolo Rodríguez e Rubén Sánchez.
Antes diso, o Grupo Deportivo Supermercados Froiz ten previsto realizar este venres en Poio a súa presentación oficial da tempada, na que contará coa presenza como padriño de Pedro Delgado e na que tamén estará acompañado do director de La Vuelta, Javier Guillén.