A Semana Santa arrinca en Ribadumia coa vixésima novena edición do Torneo Internacional Alevín Arousa Fútbol 7.
O campo da Senra será o epicentro dunha intensa fase previa que, desde o xoves até o domingo, reunirá a 65 equipos procedentes de Galicia e Asturias en busca das catro prazas que dan acceso á fase final, prevista do 22 ao 24 de maio.
A presentación oficial do torneo tivo lugar este luns precisamente sobre o céspede que acollerá os partidos.
Alí, o presidente do AF7, Manolo Diz, e o director do evento, Alberto Diz, estiveron acompañados por unha ampla representación institucional: o alcalde de Ribadumia, David Castro; o vicepresidente da Real Federación Galega de Fútbol, José Manuel Fernández; o delegado territorial da Xunta en Pontevedra, Agustín Reguera; e o presidente da Deputación, Luís López.
Unha das principais novidades desta edición é a redución no número de equipos participantes, que pasa de 80 a 65.
Este axuste modifica tamén o formato da competición de modo que a primeira fase, entre xoves e venres, organizarase en sete grupos de cinco equipos, mentres que durante a fin de semana configuraranse seis grupos.
Aínda así, o volume do torneo segue sendo notable, con máis de mil xogadores, a maioría nacidos en 2014, e ao redor de 170 partidos programados.
No deportivo, nomes como Val Miñor, Pabellón, Quirinal, Compostela, Calasanz, Ural ou Montañeros figuran entre os conxuntos a seguir, segundo avanzou a organización.
Alberto Diz quixo subliñar o respaldo institucional e privado recibido, á vez que expresou a súa satisfacción pola consolidación do torneo en Ribadumia.
O impacto do campionato transcende o estritamente deportivo, segundo destacou o alcalde, David Castro, cunha previsión dunhas 3.000 persoas que se achegarán á localidade durante estes días, o que suporá un importante impulso económico para toda a comarca do Salnés.
Na mesma liña, Luís López incidiu no papel deste tipo de citas para afianzar a marca da provincia como destino deportivo, resaltando tanto os investimentos en infraestruturas como a capacidade organizativa dos clubs e administracións.
Desde a Federación Galega tamén se puxo o acento no valor social do torneo, que favorece a convivencia entre novos futbolistas durante longas xornadas de competición.
Pola súa banda, o representante da Xunta destacou os valores que transmite o deporte e cualificou o Arousa Fútbol 7 como un dos torneos de referencia a nivel internacional.