Xa é oficial, o futbolista pontevedrés Fran Fandiño defenderá a próxima tempada as cores do Arosa Sociedad Cultural, tal e como adiantou PontevedraViva.
A negociación prolongouse máis do inicialmente previsto, pero as ganas do xogador de rematar en Vilagarcía, despois de que o Pontevedra lle comunicase que non entraba nos plans de Luisito, foron suficientes para que a operación chegase a bo porto.
O centrocampista, que marcha do club de Pasarón en calidade de cedido, explicou tras confirmarse a fichaxe que "se demorou moito a cesión porque non dependía de min, senón tamén do Pontevedra".
Fandiño asegura que "tiña moi claro que quería xogar no Arosa porque mostraron interese antes que ninguén, e se implicaron na miña fichaxe". Ademais, recoñece, "atráeme o proxecto, o estadio e a afección, é un cúmulo de moitas cousas".
O futbolista incorporarase este mesmo mércores aos adestramentos do Arosa baixo as ordes de Piscis, e farao cun obxectivo claro, o de "entrar no play off, polo menos é a miña ilusión e a miña meta este ano".