Tres derrotas consecutivas, fronte a Celta, Universitario Ferrol e Cortegada, deixaron ao Club Baloncesto Arxil nunha situación comprometida na Liga Feminina 2.
As verdes ocupan o posto 13 na clasificación, aínda que con dúas xornadas aprazadas, cun balance dunha vitoria e as tres mencionadas derrotas
Unha desas xornadas suspendidas por mor da Covid é a que debe enfrontarlle ao Rosalía santiagués, e será a primeira que recuperará ao ter previsto desprazarse este mesmo mércores 11 de novembro (21.00 horas) ata a capital galega para enfrontarse a un equipo con aínda máis urxencias, xa que non coñece o triunfo esta tempada.
As pontevedresas márcanse como obxectivo esta semana empezar a sumar en positivo e escalar posicións que lle afasten da zona baixa da táboa nun curso no que a clasificación na Liga Feminina 2 será determinante ante unha esperada reestruturación, e que na práctica pode supoñer o descenso de 28 dos 48 equipos da categoría.
O desprazamento a Santiago de Compostela será o primeiro de dous que deberá afrontar o Arxil esta semana, xa que o sábado 14 visitará ao Plasencia estremeño.