Queda aínda ano e medio para París 2024, pero o soño olímpico de laureados piragüistas nacionais pode truncarse esta mesma semana. O reaxuste de distancias na canoa para os próximos Xogos Olímpicos converteu o selectivo do C2-500 masculino que comeza este mércores no encoro asturiano de Trasona nunha auténtica final olímpica anticipada.
Cinco embarcacións parten co cartel de favoritos para adxudicarse as dúas prazas que dan acceso á Copa do Mundo que se celebra en Hungría en maio, unha competición que repartirá prazas para o mundial, no que xa estará en xogo o pase aos Xogos Olímpicos.
Non estar en maio en Szeged é quedar descolgado da carreira olímpica. Un drama. Porque a lista de saída do C2-500 está chea de medallistas mundiais. É o caso do olímpico Sete Benavides e o seu compañeiro Antoni Segura, bronce no mundial do 2019; ou de Cayetano García e Pablo Martínez, vixentes gañadores do Campionato do Mundo. Dúas embarcacións que terán que enfrontarse coa elite pontevedresa.
Adrián Sieiro e o mallorquino Joan Antoni Moreno, actuais campións de Europa e subcampións do mundo, son os principais favoritos; pero moi preto estarán os irmáns Diego e Noel Domínguez, subcampións do mundo sub 23; e tampouco hai que esquecer a Pablo Graña e Manuel Fontán, que quedaron a escasas décimas dos anteriores en selectivos previos véndose prexudicados por este feroz sistema de competición.
"Calquera destes cinco barcos será favorito a medalla olímpica en París 2024", afirma con total seguridade Daniel Costa, técnico responsable da canoa sub 23 do combinado nacional e que traballa a diario cos padeeiros pontevedreses no CGTD.
Con todo, haberá un factor alleo que pode marcar unha carreira decisiva. O vento lateral que soprará estes días no encoro de Trasona pode resultar decisivo nunha carreira tan igualada. As primeiras rúas veranse máis expostas ao vento e os zurdos sufrirano aínda máis.
As ondas serán tamén determinantes debido a que os padeeiros que adestran no Lérez ou nas Illas Baleares, que é o caso de Sieiro e Moreno, están máis afeitos ás malas condicións do mar que os que traballan habitualmente en augas tranquilas como as da Cartuxa, que é o caso de Cayetano García e Pablo Martínez.
Os dous barcos que se clasificarán para a Copa do Mundo do 12 ao 14 de maio na cidade húngara de Szeged e que tomarán vantaxe na carreira olímpica coñeceranse á primeira hora deste mércores. A saída da final do C2-500 está prevista para as 9.10 horas deste mércores e será retransmitida en directo por Teledeporte.
O resto de modalidades preséntanse menos disputadas. Antía Jácome e María Corbera son as grandes favoritas para gañar o C2 500 feminino, no que as pontevedresas Claudia Couto e Valeria Oliveira pugnarán coa súa paisana Antía Otero e a balear María Moreno pola segunda praza. No C1-200, a olímpica Jácome parte tamén con grandes opcións de lograr a clasificación.
No C1-1000 masculino, os canoístas españois non son tan dominadores a nivel global como nos barcos por equipos. Aínda así, o pontevedrés Pablo Crespo parte entre os favoritos para pelexar pola clasificación para a cita húngara.
No kaiak o dominio galego tamén é abafador. O K4 de Teresa Portela e Carolina García non terá grandes complicacións para facerse co triunfo na distancia de 500 metros, pero si que terán que esforzarse para lograr o pase no K2, no que compiten separadas. Mentres que no masculino o dominio do equipo formado por Saúl Craviotto, Carlos Arévalo, Rodrigo Germade e Marcus Cooper é indiscutible.