A emoción vai crecendo co paso das xornadas no Campionato de España Infantil Feminino de Baloncesto que se está a celebrar en Pontevedra.
Organizado grazas ao esforzo do Club Baloncesto Arxil, o torneo nacional entrou este mércores na súa fase decisiva co inicio das eliminatorias.
A elas chegaron como equipos invictos os cataláns Sant Adrià e Barça CBS xunto co SPAR Gran Canaria e o Movistar Estudiantes madrileño.
Os oitavos de final aínda contaban con dobre escenario, o Pavillón Municipal dos Deportes e o Pavillón Multiusos da Xunqueira, pero desde os choques de cuartos de final previstos a partir deste xoves e ata o final da competición todo centrarase xa na pista principal do Pavillón Municipal dos Deportes.
Alí disputaranse os cuartos, semifinais e a gran final, prevista para o vindeiro sábado 8 de xuño ás 12.00 horas.