Primeira final perdida para o Cisne, que tiña en Zarautz unha oportunidade para superar a un rival directo na loita pola permanencia, pero non foi capaz de puntuar, superado polo Amenábar nun partido vibrante, con alternativas e disputado ata o final. Os vascos fixéronse cos puntos fronte ao cadro pontevedrés, que deu a cara en todo momento pero non puido parar a Ánder Torriko, que con 11 tantos foi o verdugo dos visitantes.
O Cisne realizou uns 20 primeiros minutos sensacionais. Da man de Guille Rial, os pontevedreses dominaron o partido mandando no marcador cunha máxima vantaxe de cinco goles (3-8) que facía concibir serias esperanzas.
Pero de forma inesperada, os de Nano Martínez sufriron unha fochanca e en apenas catro minutos deixaron escapar esa renda, encaixando un parcial de 5-0, que empataba o partido por primeira vez (8-8) no minuto 24, para irse ao descanso xa por baixo (11-10), pero con todas as opcións intactas.
A segunda parte foi xa de iniciativa local, co Cisne case sempre a remolque. Amenábar conseguiu escaparse ata con catro tantos de renda (16-12, minuto 39), chegando mesmo aos cinco goles (21-16) a falta de 14 minutos.
Con todo o Cisne seguiu loitando e volveu meterse no partido. Pablo Vidal empataba (23-23) con seis minutos por xogar, obrigando ao técnico local a pedir un efectivo tempo morto, porque renovado o xogo Ánder Torriko, con dous goles sentenciaba, a pesar de que Ramón Gil volvía colocar a mínima diferenza (25-24) e que o Cisne dispoñería aínda dunha última acción para empatar, a falta de tres segundos, pero sen conseguir a igualada que por xogo e loita mereceron.
Consulta aquí o acta do partido.