Apurando ata o último día do mercado de fichaxes pero o Pontevedra xa conta co ansiado dianteiro centro que completa o plantel da presente tempada.
Trátase do cordobés Jesús Berrocal, futbolista de 29 anos que a pasada campaña defendeu as cores do Hércules de Alacante no Grupo III da Segunda División B.
Berrocal disputou a pasada tempada 32 partidos co conxunto alacantino entre liga e Copa do Rey, anotando 5 goles. Conta ademais con experiencia na Segunda División, na que competiu varios anos entre a Ponferradina e o Recreativo de Huelva.
A diferenza do resto de fichaxes realizadas polo Pontevedra, asina cos granates por dúas tempadas.
Co anuncio da súa chegada o club dá por pechado o plantel.