Importante vitoria a conseguida polo Leis Pontevedra en casa ante o Xove (5-4) que lle permite manterse no terceiro posto da Segunda B empatado co segundo clasificado.
Os pupilos de Manu Cossío sacaron adiante un encontro no que case sempre foron a remolque. De feito a única vantaxe no marcador chegou no minuto 37 co gol definitivo de Gustavo.
Empezaron ben o partido, pero pronto o cadro visitante fíxose co dominio para chegar con perigo e adiantarse aos 13 minutos.
O Leis empatou antes do descanso e empezou a segunda metade con forza en busca do segundo, pero o Xove mostrábase máis contundente en ataque. A cada igualada dos locais respondían cun novo tanto. Foi así ata o 3-4 (minuto 33).
Pese ao marcador adverso os de Manu Cossío mantivéronse concentrados e conseguiron voltear o partido nos últimos minutos cunha gran presión aproveitando as cinco faltas do seu rival.
A xornada completouna o ADFS Bueu con menor fortuna na súa visita á cancha do Guardo. Os do Morrazo perderon de maneira contundente (10-2) e seguen décimo cuartos con nove puntos.