O Asmubal Meaño foi incapaz de frear a superioridade do Mislata no partido de ida polo ascenso a División de Honra Ouro.
O cadro valenciano, que finalizou a tempada líder na súa categoría, impúxose en todas as facetas de xogo e sentenciou a eliminatoria en 60 minutos para espertar do soño ás locais, que viaxarán a Valencia a próxima semana para poñer o broche a unha tempada histórica.
O Pavillón Municipal de Coirón estaba a rebordar para vivir unha festa coa primeira participación do club nunha fase polo ascenso a Ouro Feminina.
Con todo, o poderío físico do Mislata e o mal arranque cunha parcial inicial de 1-6 en contra embazou o devir do encontro.
Reaccionaron as locais cunha gran Eli Méndez (5-9), pero as visitantes atopaban porta con demasiada facilidade e o duelo alcanzou o descanso cun avultado 9-16.
O arranque da segunda metade foi mellor para o Asmubal cun parcial de 4-0 que apertou o marcador (14-18).
Parecía que a tendencia cambiaría, pero o tempo morto solicitado polo técnico do Mislata, Alberto Estornell, provocou unha nova arrancada das súas xogadoras para frear o intento de resposta rival (14-22).
A partir dese momento o conxunto local desapareceu por completo, incapaces de seguir o ritmo ás valencianas que, cos 14 goles de Fátima Acuña, sentenciaron a eliminatoria a falta de disputarse o partido de volta (21-35).