O Teucro prepárase para unha das fins de semana máis importantes do ano, no que exercerá de anfitrión nas fases de ascenso á Primeira Nacional Masculina e á División de de Honra Prata Feminina.
Alí estará o filial azul, o Teucro Asegrupo, e o equipo feminino, o Teucro Pescamar, no que será "tres días de festa" do balonmán, asegurou na presentación dos torneos o adestrador do equipo feminino, Adrián Pumar.
A competición concentrarase entre días, desde o venres 13 ata o domingo 15 de maio, co Pavillón Municipal dos Deportes como punto central. Na súa pista disputaranse todos os encontros salvo dous da fase feminina, uno o venres e outro o domingo, que se trasladarán ao Universitario.
"Esperamos poñer a guinda a un ano moi bo", recoñece esperanzado o adestrador do filial azul, Luís Montes, e é que o Teucro Asegrup pelexará por unha das dúas prazas de ascenso que se reparten no seu sector. Máis difícil terao o Teucro Pescamar porque só un equipo ascenderá e porque competir polo salto de categoría "chega un pelín pronto", asegura Pumar, xa que o obxectivo do club pasa primeiro por facer máis sólida a estrutura feminina da entidade. A pesar diso non descartan dar a sorpresa nun torneo que "é un premio".
A entrada para os socios do Teucro será de balde, mentres o público xeral deberá pagar 7 euros por un día completo de competición ou 15 euros polos tres días.