Por primeira vez, un campionato de España de ciclocrós contará cunha proba para persoas con capacidades diferentes. Será o Nacional que acollerá a cidade de Pontevedra en xaneiro.
Así o vén de anunciar a Federación Galega de Ciclismo. A proba, que terá carácter non competitivo, busca dar visibilidade a estes deportistas e aspira a consolidarse na programación da gran cita anual da modalidade invernal do ciclismo.
A figura de Borja Gómez, o rapaz con síndrome de down que participou nos dous últimos campionatos de España de ciclocrós coa selección galega, inspirou esta idea.
O exemplo do corredor de Ponteareas ten achegado ao ciclismo a outras persoas con capacidades diferentes e o comité organizador do campionato de España que acollerá Pontevedra considerou que era oportuna a inclusión desta proba.
A estrea desta carreira realizarase o domingo 12 de xaneiro. A súa quenda chegará unha vez remate a proba raíña feminina, fixada para as 11:30 horas, e antes de que comece a competición elite masculina, ás 13:30 horas.
A organización deseñou un percorrido adaptado ás características destes ciclistas.