Tras o encontro de Copa Galicia disputado entre semana, con empate ante o Viaxes Amarelle, o Poio Pescamar volve poñer o chip ligueiro para tentar prolongar a súa condición de equipo invicto na Primeira División.
As vermellas reciben este sábado (18:30 horas) o actual pechacancelas da competición, o Guadalcacín andaluz, que na súa segunda campaña na elite encaixou cinco derrotas nas cinco primeiras xornadas.
Non quere exceso de confianza Dani Díaz, que poderá contar con todo o plantel á súa disposición fóra da lesionada Antía.
Desta forma a convocatoria do Poio Pescamar complétana: Silvia, Irene Floriani, Carol, Jenny Lores, Ale de Paz, Daniella Sousa, Ceci, Iria Saeta, Irene García, Jéssica Motato e a canteirá Inés Mayán.
A pesar de contar con dous partidos menos que os seus rivais, o cadro conserveiro aspira a conseguir tres puntos que lle acheguen aos postos de privilexio.