Importante partido para o Poio Pescamar este sábado na pista dun dos seus rivais directos na clasificación, o Ourense Envialia.
O derbi autonómico poderá seguirse en directo pola segunda canle da Televisión de Galicia.
As vermellas chegan ao choque despois de encadear catro vitorias consecutivas, o que as levou á sexta posición da táboa en Primeira División con 13 puntos, os mesmos cos que conta un Ourense que é cuarto e que a pasada xornada encaixou en Alacante a súa primeira derrota da tempada.
Será a oportunidade de medir a ambición do equipo adestrado por Marcio Santos, situado a só tres puntos do liderado e que quere asentarse nos postos de privilexio na máxima categoría.