O Pontevedra xógase algo máis que tres puntos no seu próximo partido de liga. Sen coñecer a vitoria despois de tres xornadas disputadas e coa imaxe polos chans despois da última derrota en Pasarón, os de Ángel Rodríguez tratarán de emendar o rumbo da nave granate cunha vitoria contra o Bergantiños. E para que logralo sexa máis fácil, o club anima aos seus afeccionados a acompañar ao equipo cunha viaxe organizada para ver o partido por 25 euros.
"Granates, o equipo precisa de vós fronte ao Bergantiños. Apúntate á viaxe por 25 euros nas oficinas desde hoxe ata o venres ás 12 horas", recolle o tweet publicado na conta oficial do Pontevedra este martes. Puntualizan desde a entidade que a viaxe só poderá realizarse se logran reunir un total de 45 persoas.
VIAXA CO PONTEVEDRA
— Pontevedra CF (@PontevedraCFSAD) September 21, 2021
¡Granates, o equipo precisa de vós fronte ó @BerganFC! Apúntate á viaxe por 25 € (entrada+bus) nas oficinas dende hoxe ata o venres ás 12.00 do mediodía (só efectivo).
IMPORTANTE: SÓ SE PODERÁ ORGANIZAR A VIAXE EN CASO DE HABER POLO MENOS 45 INSCRITOS pic.twitter.com/myWi0k5jn6
A saída está prevista para o domingo ás 16.30 horas desde o Pavillón Municipal con regreso ao finalizar o partido, que comezará ás 19 horas.
Varios seguidores preguntaron xa pola posibilidade de adquirir soamente a entrada nas oficinas do club, posto que o grupo de afeccionados Siareiros Granates está a organizar de forma paralela, en coches particulares, o desprazamento a Carballo. Con todo, desde o club soamente están autorizados a vender o paquete completo de entrada máis autobús.
Pontevedra e Bergantiños marchan na zona baixa da clasificación despois de tres xornadas de liga disputadas na que só lograron sumar dous puntos despois de dous empates e unha derrota. Con todo, é o cadro granate o que precisa un triunfo con maior urxencia para escalar postos na táboa e seguir aspirando ao primeiro posto, que outorga o ascenso directo a 1ª RFEF, que é o obxectivo marcado polo Pontevedra esta tempada.