Primeira saída do Pontevedra Club de Fútbol na fase pola permanencia na Segunda RFEF. Os granates, colíderes do grupo con 24 puntos, visitan o filial do Real Sporting de Xixón (sextos con 17) este domingo ás 12.00 horas na cidade deportiva de Mareo.
Os pontevedreses viaxan a Asturias sobre aviso, tras o seu apurado triunfo en Pasarón fronte ao Covadonga. "Xa vimos o outro día o difícil que é gañar estes partidos", recoñece Luisito.
Segundo o técnico, esixente cos seus, "para gañar en Xixón temos que facer as cousas moito mellor", asegura.
O conxunto da Boa Vila, que busca un triunfo que lles permita aumentar a súa renda sobre o descenso, conta ademais con atoparse a un rival reforzado con xogadores que se están na dinámica do primeiro equipo, en Segunda División, ao estar programado para este venres o seu partido da xornada. "Conto con que os do primeiro equipo van estar o domingo", sinala Luisito, para quen "os filiais teñen futbolistas dunha calidade individual tremenda".
Pola contra Jorge Fernández perderá a cita por lesión, pero si retornan á convocatoria Imanol tras cumprir un encontro de suspensión e Borja Martínez.
O colexiado do encontro será o rioxano Miguel Sesma Espinosa.