Xornada clave para o Poio Pescamar na súa pelexa para volver xogar o play-off polo título de liga.
O conxunto conserveiro, quinto na táboa con 36 puntos, pon a proba a súa recuperación visitando a un Alcorcón que con 42 puntos ocupa a última das prazas que darían acceso a pelexar polo campionato.
Unha auténtica final a deste sábado (16.00 horas) para as xogadoras adestradas por Luis López-Tulla, que encadean catro triunfos consecutivos en liga cando restan 10 xornadas.
Pola súa banda o Alcorcón, aínda que chega á cita tras sufrir unha derrota na pista do Alcantarilla, mostrouse intratable esta campaña como local con nove triunfos e só un empate (contra o líder Burela). É de feito o terceiro máximo goleador e o equipo menos goleado.
O MARÍN, NA CASA
Será unha xornada importante tamén para o Marín Futsal, no seu caso para tentar aumentar as súas opcións de permanencia na máxima categoría.
O cadro marinense, a seis puntos da zona de salvación, recibirá na Raña (17.00 horas) a un rival de media táboa, o Futsal Alcantarilla.
Ramiro Díaz terá a todo o plantel dispoñible para o envite.