Os xuvenís do CW Galaico Pontevedra regresan de terras canarias cun oitavo posto no peto. Así finalizaron o Campionato de España de wáter-polo xuvenil que se disputou a pasada fin de semana na piscina do CN Metropole de Las Palmas.
Na fase de grupos, o equipo pontevedrés iniciou a competición caendo por 9-4 ante o CW Castelló, un equipo moi completo e con xogadores de gran nivel; mentres que no segundo partido lograban a clasificación para os oitavos de final tras derrotar pola mínima (4-3) o Gymnápolis Soller balear. Pecharon este primeiro tramo do torneo cunha contundente derrota (16-5) fronte a La Latina madrileño, equipo que chegaría á final.
Xa na loita polos postos 5 ao 8 e xa sen rivais alcanzables, o CW Galaico Pontevedra debutou ante outro filial dun Primeira División, o C. Askartza Clarete de Leioa. A experiencia competitiva dos vascos quedou reflectida na auga, gañando con comodidade aos do Lérez cun marcador de 4-15, sendo determinante o aspecto físico sobre todo nas xogadas de boia, principalmente pola diferenza de idade.
O último partido do campionato para os pontevedreses foi fronte aos organizadores, o CN Metropole, na final polo sétimo posto. Outro rival filial dun Primeira Nacional, que fixera bos partidos ao longo do campionato. Aínda así, os xogadores do Galaico deron o talle ata o final, a pesar de empezar perdendo 4-1 no primeiro cuarto, e a punto estiveron de dar a sorpresa. Un gol no último segundo permitiu gañar aos canarios 10-9.
En resumo, o de Las Palmas foi un bo campionato do Club Waterpolo Galaico Pontevedra que participou cun equipo moi novo, cun infantil, seis cadetes e só catro xuvenís -que se despediron da categoría-. Todos eles tiveron a oportunidade de xogar fronte a equipos e xogadores con experiencia en ligas nacionais e mesmo xogadores internacionais. Unha grande oportunidade de seguir adquirindo experiencia para o futuro.
En concreto, xogaron o campionato Raúl Viceiro, Juanjo Roca, Iago Facal, Luis Mosquera, Mauro Rivas, Héctor Velasco, Aarón Tellería, Xoán González, Artai Poses, Jacobo Baltasar e Rubén Rodríguez.