Semana atípica para o Pontevedra Club de Fútbol, que deberá afrontar en catro días dous partidos como local no Estadio Municipal de Pasarón.
Antes de recibir o domingo (17:00 horas) ao Somozas en liga, os granates debutan este xoves (20:30 horas) na Copa Federación ante o Marino de Luanco, no partido de ida de dezaseisavos de final.
Será unha oportunidade para os futbolistas que menos contaron ata o momento para Luisito, e que dispoñerán de minutos buscando convencer ao adestrador xa que o técnico dará descanso aos habituais coa mente posta no duelo do domingo.
Tamén será unha boa ocasión para que xogadores que arrastraron problemas físicos durante as últimas semanas recuperen o ritmo de competición, caso de Jacobo, Capi ou Tomás.
Estes dous últimos, que foron baixa en Vigo a pasada fin de semana, reintegránronse no grupo, polo que salvo contratempo o único xogador que non estará dispoñible ante o Somozas será Adrián Mouriño por sanción, ao ver contra o Celta B o seu quinto cartón amarelo da tempada.
Os abonados do Pontevedra poderán presenciar de balde o choque ante o Marino de Luanco, actual noveno clasificado da Terceira División asturiana, mentres as entradas para o público fixáronse en 12 euros para Tribuna, 8 euros para Preferencia e 5 para os fondos.
Arbitrará o encontro o colexiado galego Gonzalo Villanueva Carballo.