Os nenos e nenas que se atopan ingresados no Complexo Hospitalario Universitario de Pontevedra recibiron este venres unha visita especial, a de varios xogadores do primeiro plantel do Pontevedra Club de Fútbol.
Ata o Hospital Provincial, onde se atopa o servizo de pediatría, achegáronse Edu Sousa, Nacho, Éder, Mouriño e Álex Fernández, acompañados do conselleiro responsable da área deportiva, Roberto Feáns, antes de afrontar o adestramento matinal.
Os futbolistas compartiron experiencias cos pequenos, asinaron autógrafos e tomaron fotos con eles. Ademais repartiron entre as nenas e nenos adhesivos e globos do club.
A visita do Pontevedra Club de Fútbol enmárcase dentro da celebración do Día Mundial da Actividade Física por parte do complexo hospitalario.