A Xunta asinou esta mañá os contratos de patrocinio cos deportistas galegos clasificados para os Xogos Olímpicos ou con opcións de facelo. A cambio, o executivo autonómico pídelles a estes 25 deportistas, que recibirán unha axuda de 5.000 euros, que lideren campañas de loita contra a violencia de xénero.
Nun acto no CGTD no que participou o vicepresidente da Xunta, Alfonso Rueda; o secretario xeral para o deporte, Lete Lasa; e a secretaria xeral para a igualdade, Susana López; tivo lugar a firma destes contratos. Os 25 primeiros beneficiados destas axudas son o triatleta Javier Gómez Noya, o piragüista Cristian Toro, a nadadora María Vilas, a judoka María Bernabeu e os regatistas Tamara Echegoyen e Nicolás Rodríguez.
Rueda destacou que todos eles son referentes na transmisión dos valores do deporte e desde agora serano tamén da difusión de que non pode haber discriminación por razón de sexo e da necesidade de erradicar este tipo de violencia.
Pola súa banda, os deportistas comprométense a difundir, polo menos unha vez ao mes, mensaxes nos seus perfís de redes sociais relacionados coa loita pola tolerancia, a igualdade entre mulleres e homes e a repulsa cara á violencia de xénero no deporte e na vida.