O atletismo galego arrincou o 2026 con forza e éxito na Rúa (Ourense), onde este sábado se disputou o Campionato Xunta de Galicia de Campo a través. A cita reuniu os mellores clubs e atletas do panorama autonómico e deixou un balance inmellorable para o Club Deportivo Pinarium de Marín e a Sociedad Gimnástica de Pontevedra.
O CD PINARIUM FAI HISTORIA
A primeira alegría chegou da man do conxunto marinense, que se proclamou campeón galego de campo a través por clubs en categoría masculina, logrando así a primeira vitoria senior absoluta da historia para un club do municipio nesta disciplina.
A pesar da marcha ao Playas de Castellón do salmantino David de la Fuente, peza clave nos últimos éxitos do club, o equipo foi capaz de rearmarse e mellorar os resultados de 2024 (bronce) e 2025 (prata) para, finalmente, subir ao máis alto do podio.
O equipo campión estivo formado por Jorge Puig, Gustavo Santiago, Manuel Lorenzo, Álvaro Prieto, Jaime García, José A. Santiago, Andrés Rodríguez e David Otero.
Grazas a este triunfo, o Pinarium obtén de novo praza directa para o Campionato de España de Campo a través por Clubs, que se celebrará en novembro en Atapuerca (Burgos), onde representará ao atletismo galego xunto ao C.A. Narón.
MEDALLAS E PRESENZA EN PODIOS
Tras o éxito organizativo da San Silvestre, a Sociedad Gimnástica inaugurou o novo ano con excelentes resultados. Reforzado con novas incorporacións, asinou unha actuación sobresaliente que se traduciu en presenza en numerosas medallas e varios podios.
Destacaron especialmente os ouros de Sabela Martínez (sub20) e Pepe Sánchez del Valle (sub23), este último debutando coa Gimnástica. Ambos os dous repetiron triunfo cos seus equipos de remudas, que dominaron nas categorías sub20 feminina e sub23 masculina.
No conxunto feminino, Sabela estivo acompañada por María Estévez, Sara Cristina Diz, Aroa Barbeito e Paula Torres, con María e Paula tamén subindo ao podio individual. A primeira foi prata sub20 e, a segunda, bronce sub18.
Pola súa banda, Sánchez del Valle logrou tamén un dobrete co título individual e o ouro por equipos en remudas sub23.
En categoría absoluta, o equipo feminino proclamouse campión galego, mentres que os sub18 masculino e feminino conquistaron senllos bronces.
Destacaron así mesmo as actuacións individuais de Isa Caeiro (cuarta sub23), Ainoa Gontán (quinta sub23) e Hugo Dopazo (quinto sub18).
Ademais, a Sociedad Gimnástica pechou o 2025 cunha gran actuación no Campionato Galego de Probas Combinadas por Clubs, celebrado tamén en Ourense. Baixo a dirección de Julio Ventín, o equipo formado por Sergio Lamas, Álvaro Fontán, Iago Gómez e Mario Tegegn Míguez sumou 11.367 puntos e colgou o bronce autonómico.