A comisión deportiva do Pontevedra Club de Fútbol ten sobre a mesa os primeiros nomes de posibles reforzos de cara á próxima tempada.
Entre os plans está reforzar a dianteira e para iso pousaron os seus ollos no pichichi de Terceira a pasada campaña, Jorge Cano (Cerceda), pero tamén no dianteiro redondelano Pablo Couñago, que acaba de abandonar as filas do Choco.
Couñago fixo as maletas para asinar polo FC Honka da primeira división finlandesa, pero incluíu unha cláusula que lle permite rescindir o seu contrato e estaría disposto a regresar á casa para xogar en Pasarón, especialmente se finalmente o club lerezano pode ocupar a praza do Puertollano en Segunda B. Con todo o dianteiro tampouco vería con malos ollos vestir de granate en Terceira División.
O futbolista que está máis preto de recalar no Pontevedra é neste momento Sergio Lloves. Xa mantivo contactos co club para ultimar o seu regreso e, a pesar das ofertas de clubs como o Compostela e o Somozas, inclínase por retornar á cidade de Lérez tras defender medio ano a portaría do Villalonga.
Entre os demais nomes que baralla a comisión deportiva encóntranse os do lateral do Racing de Ferrol Rubén Comesaña, o centrocampista do Cerceda Herbert ou o xa ex-futbolista do Celta B Diego Maceira, que defendeu un ano as cores do Pontevedra na súa etapa de xuvenil e que finalizou contrato co club vigués.
PRIMEIRAS SAÍDAS
Aínda que asegurou non ter recibido a chamada do Pontevedra para comunicarllo oficialmente, Paco despediuse este xoves oficialmente despois dunha tempada na que perdeu a titularidade nos primeiros partidos de liga en favor de Edu Sousa.
Paco segue así os pasos de Javi Otero, que confirmou a súa fichaxe polo Racing Villalbés. Non serán os únicos que se despedirán do club granate, que ofreceu a renovación en principio a dez xogadores: David Feito, Edu, Adrián, Pablo, Fran Fandiño, Pedro Crespo, Tubo, Kevin Presa, Tomás e Pablo Carnero.